DakshTimes News Network
काशिनाथ शिंदे
पुणे शहरातील अवैध हुक्का व्यवसायावर काळेपडळ पोलिसांनी मोठी धडक कारवाई करत पिसोळी येथील एका फार्महाऊसवर सुरू असलेली बेकायदेशीर हुक्का पार्टी उद्ध्वस्त केली. या कारवाईत तीन चारचाकी, दोन दुचाकी, १२ मोबाईल, आठ हुक्का पॉट, तंबाखूजन्य हुक्का फ्लेवर व इतर साहित्य असा एकूण ₹७५,८०,७३९ किंमतीचा मुद्देमाल जप्त करण्यात आला असून संबंधितांविरुद्ध गुन्हा दाखल करण्यात आला आहे.
पोलीस आयुक्तांच्या आदेशानुसार पुणे शहरात अवैध धंदे, तडीपार आरोपी, अभिलेखावरील गुन्हेगार व बेकायदेशीर कृत्यांवर विशेष मोहीम सुरू असताना काळेपडळ पोलीस ठाण्याच्या तपास पथकाला गोपनीय माहिती मिळाली. पोलीस अंमलदार महादेव शिंदे व अतुल पंधरकर यांना मिळालेल्या माहितीनुसार पिसोळी येथील आंबिका हॉटेल रोड, जगदंबा मार्गाजवळील एका फार्महाऊसमध्ये अनिस सय्यद व साद सय्यद हे अवैधरित्या चोरीछुप्या पद्धतीने हुक्क्याची विक्री करून ग्राहकांना हुक्का पाजत असल्याचे समोर आले.
माहितीची खातरजमा केल्यानंतर पोलिसांनी तात्काळ फार्महाऊसवर छापा टाकला. यावेळी ८ ते १० जण अनधिकृतपणे हुक्का पित असल्याचे आढळून आले. सर्वांना ताब्यात घेऊन घटनास्थळावरून तीन चारचाकी, दोन दुचाकी, १२ मोबाईल फोन, आठ हुक्का पॉट, तंबाखूजन्य हुक्का फ्लेवर व इतर साहित्य असा एकूण ₹७५.८० लाखांचा मुद्देमाल जप्त करण्यात आला.
या प्रकरणी काळेपडळ पोलीस ठाण्यात गुन्हा रजिस्टर क्रमांक २९८/२०२६ अन्वये भारतीय न्याय संहिता कलम ३(५) तसेच सिगारेट व अन्य तंबाखूजन्य उत्पादने (महाराष्ट्र सुधारणा) अधिनियम, २०१८ मधील कलम ४-अ व २१-अ नुसार गुन्हा दाखल करण्यात आला असून पुढील तपास सहाय्यक पोलीस निरीक्षक अमित शेटे करीत आहेत.
ही उल्लेखनीय कारवाई पोलीस उपआयुक्त परिमंडळ-६ जीवन बेनिवाल, सहाय्यक पोलीस आयुक्त अतुलकुमार नवगिरे, वरिष्ठ पोलीस निरीक्षक गिरीषा निंबाळकर यांच्या मार्गदर्शनाखाली पोलीस निरीक्षक (गुन्हे) आण्णासो बाबर यांच्या सूचनेनुसार सहाय्यक पोलीस निरीक्षक अमित शेटे, पोलीस उपनिरीक्षक रघुवीर खोडा तसेच तपास पथकातील प्रवीण काळभोर, दाऊद सय्यद, प्रतीक लाहीगुडे, शाहीद शेख, निलेश देसाई, अमोल फडतरे, अतुल पंधरकर, विशाल ठोंबरे, लक्ष्मण काळे, नितीन ढोले, सद्दाम तांबोळी, प्रदीप बेडीस्कर, महादेव शिंदे, गिरीराज जगदाळे, नंदकुमार जावळे, ज्ञानेश्वर कुलाळ, अक्षय जगताप, शुभम पवार आणि मेघराज जाधव यांनी संयुक्तपणे पार पाडली. या धाडसी कारवाईबद्दल पथकाचे सर्वत्र कौतुक होत आहे.
