Oplus_131072
काशिनाथ शिंदे :पिंपरी-चिंचवड शहरात अंमली पदार्थांच्या वाढत्या अवैध व्यापाराला आळा घालण्यासाठी पोलिसांनी विविध भागांत धडक कारवाया करत पाच आरोपींना अटक केली आहे. रहाटणी, नेहरूनगर, निगडी, रावेत आणि नवलाख उंबरे येथे करण्यात आलेल्या या कारवायांमध्ये १.६ किलोहून अधिक गांजा, एमडी सदृश्य अंमली पदार्थ तसेच रोख रक्कम असा मोठा मुद्देमाल जप्त करण्यात आला.
काळेवाडी पोलिसांनी रहाटणीतील कोकणे चौक परिसरात सापळा रचून १९ वर्षीय तरुणाला ताब्यात घेतले. त्याच्याकडून १.९२ ग्रॅम एमडी सदृश्य पावडर जप्त करण्यात आली असून एकूण १६ हजार ८५० रुपयांचा मुद्देमाल हस्तगत करण्यात आला.
संत तुकारामनगर पोलिसांनी नेहरूनगर येथील आण्णासाहेब मगर स्टेडियम परिसरात कारवाई करून ३२६ ग्रॅम गांजासह एका आरोपीला अटक केली. या कारवाईत सुमारे १६ हजार रुपयांचा गांजा जप्त करण्यात आला.
निगडी पोलिसांनी भक्तीशक्ती चौक अंडरपास परिसरात ४९.२७ ग्रॅम गांजाची वाहतूक करणाऱ्या एका युवकाला पकडले. त्याच्याकडून २ हजार ४५० रुपयांचा गांजा जप्त करण्यात आला.
गुन्हे शाखेच्या युनिट-२ ने रावेत येथील हॉटेल गावकरी थाटसमोर कारवाई करत २२१ ग्रॅम गांजासह एका आरोपीला अटक केली. या प्रकरणात ११ हजार ५० रुपयांचा मुद्देमाल जप्त करण्यात आला.
तळेगाव एमआयडीसी पोलिसांनी नवलाख उंबरे-बधलवाडी रोडवरील मुक्ताई मंदिराजवळ छापा टाकून १ किलो ७ ग्रॅम गांजासह एका आरोपीला अटक केली. त्याच्याकडून गांजा व रोख रक्कम मिळून ५१ हजार १५० रुपयांचा मुद्देमाल जप्त करण्यात आला.
या सर्व प्रकरणांमध्ये संबंधित पोलीस ठाण्यांमध्ये अंमली पदार्थविरोधी कायद्यान्वये गुन्हे दाखल करण्यात आले असून अंमली पदार्थांच्या पुरवठा साखळीचा शोध घेण्यासाठी पुढील तपास सुरू असल्याची माहिती पोलिसांनी दिली.
About the Author
